फागुन १२ गतेदेखि हुने डुम्रे महाेत्सव पुल्चोकमा हुने
तनहुँको डुम्रेमा फागुन १२ गतेदेखि हुने चौथो डुम्रे सांस्कृतिक तथा व्यापारिक महोत्सव पुल्चोकमा हुने भएको छ । “व्यापारिक, सांस्कृतिक, पर्यटकीय विकासको नारा, डुम्रे महोत्सवको अभिभारा” भन्ने मुख्य नारा सहित यही फागुन १२ गतेदेखि २५ गतेसम्म हुने महोत्सव भानु नगरपालिका वडा नं १ काे पुल्चोकमा हुने महाेत्सवका प्रवक्ता सुवाेध अधिकारीले बताए । अहिलेसम्म महाेत्सव तयारी ७० प्रतिशत पूरा भएको भन्दै अधिकारीले कृषि , पशु क्षेत्रलाई प्राथमिकतामा राखेर याम्पाकाे अर्गानिक उत्पादन ल्याउने वातावरण मिलाउने जानकारी दिए ।
तनहुँ उद्योग वाणिज्य संघ, डुम्रे बजार इकाइको आयोजनामा हुने महोत्सवले यस क्षेत्रका आर्थिक, सामाजिक, सांस्कृतिक र पर्यटन प्रवर्द्धनमा योगदान पुर्याउने उद्देश्य राखिएको छ । तनहुँ उद्योग वाणिज्य संघका अध्यक्ष हेमलाल भिकेले महोत्सवले यस क्षेत्रको समग्र विकासमा टेवा पुग्ने विश्वास व्यक्त गरे।महोत्सवमा स्थानीय उत्पादन, व्यापारिक स्टल, सांस्कृतिक कार्यक्रम, पर्यटकीय गतिविधि र मनोरञ्जनात्मक कार्यक्रमहरू प्रस्तुत गरिने आयोजकले जनाएको छ। महोत्सवले क्षेत्रीय पहिचानलाई अझ सुदृढ गर्दै आर्थिक गतिशीलता बढाउने अपेक्षा गरिएको छ।
महोत्सवको तयारीलाई थप प्रभावकारी बनाउन विभिन्न समिति र उपसमितिहरू गठन गरेर तयारीलाई तिव्रता दिइएको छ । महोत्सवको सफल सञ्चालनका लागि आर्थिक व्यवस्थापन, सांस्कृतिक कार्यक्रम, प्रचार(प्रसार, सुरक्षा, र सञ्चालन समिति लगायतका उपसमितिहरू गठन गरी जिम्मेवारी तोकिएको हाे ।
व्यवसायी, सरोकारवाला निकाय स्थानीयवासीहरूको सहयोगमा महोत्सवलाई भव्य बनाउनका लागि तयारी तीव्र रूपमा भइरहेको आयोजकले जनाएको छ। महाेत्सवका स्टल संयाेजक राम जाेशीले अहिले स्टल बुकिङ खुल्ला रहेको जानकारी दिए । यस्तै डुम्रे इकाईका सचिव महेन्द्र शाहीले चिठी , निमन्त्रणा काे काम अन्तिम चरणमा पुगेको र सचिवालयले दैनिक रूपमा काम गरिरहेकाे जानकारी दिए ।
