तनहुँ प्रहरीकाे अर्को सफलता – गिरीकाे हत्यामा संलग्न शुक्ला र व्यासका ३ युवा २४ घण्टाभित्र पक्राउ
तनहुँको शुक्लागण्डकी नगरपालिका–७ स्थित टुडा जाने बाटोमा एक पुरुषको हत्या गरी फरार रहेका व्यक्तिलाई प्रहरीले तत्कालै पक्राउ गरेको छ ।
पक्राउ पर्नेमा शुक्लागण्डकी नगरपालिका वडा नं ७ टुडा निवासी २१ वर्षीय अमन गुरुङ, वडा नं ५ बेलचौतारा निवासी १८ वर्षीय रुपेश क्षेत्री र व्यास वडा नं १२ छिर्कने निवासी १८ वर्षीय विजय गौतम रहेका छन्।
व्यास नगरपालिका स्थायी घर भई हाल भिमाद नगरपालिका वडा नं ८ बसोबास गर्दै आएका ५५ वर्षीय मंगल गिरीको हत्यामा संलग्न उनीहरुलाई प्रहरीले पक्राउ गरेको हो ।
बैशाख १ गते बिहान टुडा जाने बाटोमा टाउकोमा गहिरो चोट लागेको अवस्थामा गिरिको शव फेला परेको थियो ।
उक्त सूचना प्राप्त भएलगत्तै इलाका प्रहरी कार्यालय बेलचौतारा, तनहुँबाट खटिएका प्रहरी टोलीले घटनास्थलमा पुगेर अनुसन्धान सुरु गरेको जनाएको छ ।
प्रहरीका अनुसार गिरिलाई ढुङ्गाले टाउकोमा प्रहार गरी हत्या गरिएको प्रारम्भिक अनुसन्धानमा जनाइएको छ ।
उक्त घटना सम्बन्धमा बैशाख २ गते तनहुँ जिल्ला अदालतबाट म्याद थप अनुमति लिई थप अनुसन्धान अघि बढाइएको प्रहरीले जानकारी दिएको छ।
