तनहुँको गाछेपानीका युवा बेलचौतारामा मोटरसाइकलसहित मृत अवस्थामा फेला

तनहुँ । जिल्लाको शुक्लागण्डकी नगरपालिका–२ गाछेपानी स्थायी घर भई हाल वडा नं. ५ बेलचौतारामा बस्दै आएका २६ वर्षीय संसार भुजेल मृत अवस्थामा फेला परेका छन्।
प्राप्त जानकारीअनुसार भुजेल मिति २०८२/१०/०१ गते अपराह्न करिब ४ बजे भिमाद नगरपालिका–६ स्थित रंगशालामा भलिबल खेल हेर्न जाने भन्दै ग १३ प ४०४२ नम्बरको बुलेट मोटरसाइकल चलाएर घरबाट निस्किएका थिए। तर उनी घर नफर्किएपछि उनका बुबाले मिति २०८२/१०/०२ गते अपराह्न करिब ३ बजे इलाका प्रहरी कार्यालय बेलचौतारामा हुलिया निवेदन दिएका थिए।
हुलिया निवेदन प्राप्त भएपछि इलाका प्रहरी कार्यालय बेलचौताराबाट खटिएको प्रहरी टोलीले आफन्तको सहयोगमा खोजतलास गर्ने क्रममा सोही दिन साँझ करिब ६ बजे तनहुँको म्याग्दे गाउँपालिका–५ धारापानीस्थित भिमाद–बेलचौतारा भित्री सडकखण्डबाट करिब ४०–४५ मिटर तल रुपाकुना खोलाको खोँचमा मोटरसाइकलसहित भुजेलको शव फेला पारेको हो।

शव साँझ करिब ८ बजे घटनास्थलबाट बाहिर निकालेर पोस्टमार्टमका लागि प्रदेश अस्पताल दमौली पठाइएको प्रहरीले जनाएको छ। घटनाको कारणबारे थप अनुसन्धान भइरहेको प्रहरीले जानकारी दिएको छ।