दमौली आसपासमा देखिएको भनिएका विष्णु ढकालको खोजीमा सहयोगको अपिल, छोराहरूले गरे आग्रह

दमौली, साउन ९ – लामो समयदेखि सम्पर्कविहीन रहेका विष्णु ढकालको खोजीमा उनका छोराहरूले सामाजिक अभियन्ता अर्जुन भुसालसँग सहयोगको आग्रह गरेका छन्। भुसालले आफ्नो युट्युब च्यानलमार्फत सार्वजनिक गरेको भिडियोमा छोराहरूले पछिल्लो समय विष्णु ढकाल तनहुँको दमौली आसपासमा देखिएको सूचना प्राप्त भएपछि खोजीका लागि सहयोग मागेका हुन्।
भिडियोमा उल्लेख गरिएअनुसार छोराहरू सूचना पाएलगत्तै दमौली आएर करिब चार–पाँच दिनसम्म विभिन्न स्थानमा खोजी गरेका थिए। रातको समयमा समेत सडक आसपास बसेर सम्भावित स्थानमा खोजी गरे पनि हालसम्म विष्णु ढकालको अवस्था र ठेगाना खुल्न सकेको छैन।
परिवारका अनुसार विष्णु ढकालको देब्रे खुट्टा राम्रोसँग चल्दैन। उनी लौरीको सहारामा हिँड्ने, मागेर जीवनयापन गर्ने र कहिलेकाहीँ मदिरा सेवन गर्ने गरेको बताइएको छ। त्यसैले उनलाई भेट्न सहज हुने विश्वासका साथ सर्वसाधारणसँग सहयोगको अपिल गरिएको हो।
सामाजिक अभियन्ता अर्जुन भुसालले भिडियोमार्फत दमौली तथा आसपासका बासिन्दालाई विष्णु ढकाल कतै देखेमा तत्काल परिवार वा नजिकको प्रहरी कार्यालयमा जानकारी गराइदिन अनुरोध गरेका छन्। उनका अनुसार परिवारलाई पुनर्मिलन गराउनु नै अभियानको मुख्य उद्देश्य हो।

परिवारले दमौली आसपासका स्थानीयवासीमा अनुरोध गरेको छ— यदि देब्रे खुट्टामा समस्या भएका, लौरी टेकेर हिँड्ने विष्णु ढकाललाई कतै देख्नुभएको वा उहाँबारे कुनै जानकारी छ भने नजिकको प्रहरी कार्यालय वा सम्बन्धित परिवारसँग सम्पर्क गरी मानवीय सहयोग गरिदिनुहोस्।