आँबुखैरेनी गाउँपालिका स्तरीय छैटौं राष्ट्रपति रनिङ्ग शिल्डकाे उपाधि मित्रता माविलाइ

आँबुखैरेनी गाउँपालिका स्तरीय छैटौं राष्ट्रपति रनिङ्ग शिल्ड प्रतियोगिताको उपाधि मित्रता माध्यमिक विद्यालयले हात पारेको छ । मित्रता माविले १२ स्वर्ण १२ रजत र २ कास्य पदक सहित राष्ट्रपति रनिङ्ग शिल्डकाे उपाधि हात पारेको हाे ।
शनिबार भएको फाइनल खेलमा रामशाह माविले ११ स्वर्ण ११ रजत र ४ कास्य सहित दोस्रो भयो भने ३ स्वर्ण १ रजत र ११ कास्य सहित फ्युचर स्टार बाेडिङ्ग स्कुल तेस्रो भयाे । विजेता विद्यालय र विद्यार्थीले मेडल, प्रमाणपत्र तथा ट्रफी प्राप्त गरेका छन् ।
आँबुखैरेनी गाउँपालिका भित्रका सामुदायिक एवं संस्थागत गरी १० विद्यालयको सहभागिता रहेको प्रतियोगितामा एथलेटिक्स, भलिबल लगाएतका खेल सम्पन्न गरिएको आँबुखैरेनी शिक्षा शाखा प्रमुख निर्मला कुँवरले जानकारी दिइन् ।

पुरस्कार वितरण कार्यक्रममा बोल्दै गाउँपालिका उपाध्यक्ष दुर्गा अर्यालले स्वास्थ्य र प्रतिभा प्रस्फुटन गर्दै राष्ट्रिय तथा अन्तर्राष्ट्रिय स्तरमा खेल मार्फत देश चिनाउने अभियानको शुरुवात विद्यालय स्तरको खेलबाट हुने बताइन् ।

खेलको माध्यमबाट अन्तरनिहित प्रतिभा प्रस्फूटन गर्न सकिने हुँदा गाउँपालिकाले अतिरिक्त क्रियाकलापलाई समेत जोड दिँदै आएको उनकाे भनाई थियो । खेलको विकासका लागि गाउँपालिकाले योजनावद्ध तरिकाले काम गरिरहेको उपाध्यक्ष अर्यालले बताइन् ।