म्याग्दे गाउँपालिका अन्तर बिद्यालय स्तरीय ब्याडमिन्टन प्रतियोगितामा जनगणपती मावि प्रथम
म्याग्दे गाउँपालिका अन्तर बिद्यालय स्तरीय ब्याडमिन्टन प्रतियोगितामा जनगणपती मावि प्रथम भएको छ । साेमबार थर्पु कभर्डहलमा भएको प्रतियोगितामा द्धितीय तथा तृतीय दुबै स्थान मेघदह स्कुल हुन सफल भएको छ । राष्ट्रपति रनिङ शिल्ड प्रतियोगिता अन्तर्गत पहिलोपटक समावेश गरिएको प्रतियोगिताकाे म्याग्दे गाउँपालिकाका अध्यक्ष श्रीप्रसाद श्रेष्ठले उद्घाटन गर्नुभएको थियो ।
कार्यक्रमकाे उद्घाटन गर्दै प्रमुख अतिथि अध्यक्ष श्रेष्ठले म्याग्देकाे पहिचानको रूपमा रहेको ब्याडमिन्टन खेलमा नयाँ पुस्ता उत्पादन गर्नका लागि पहिलोपटक प्रतियोगिता आयाेजना गरिएको बताउनुभयो ।
खेलाडीहरूले अत्यन्तै अनुशासनमा खेल खेल्ने उहाँको भनाइ थियो । म्याग्दे ब्याडमिन्टनमा अब्बल रहेको हुँदा बिद्यार्थी सर्कल देखि नैँ राम्रो खेलाडी उत्पादन गर्नकाे लागि पहिलोपटक प्रतियोगिता आयाेजना गरिएको गाउँपालिकाका उपाध्यक्ष बालकृष्ण घिमिरेले बताउनुभयो ।
कार्यक्रममा म्याग्दे गाउँपालिकाका प्रमुख प्रशासकिय अधिकृत नारायण प्रसाद अधिकारीले अध्यक्ष कप र राष्ट्रपति रनिङ शिल्ड प्रतियोगिता गरेर म्याग्देले वर्षमा दुईवटा ठुला खेल प्रतियोगिता आयाेजना गर्ने गरेको बताउनुभयो । म्याग्दे ३ का अध्यक्ष टुकराज अधिकारीकाे अध्यक्षतामा भएको कार्यक्रमकाे सहजीकरण शिक्षा शाखाका महेश भट्टराईले गर्नुभएको थियो ।
प्रतियोगितामा पालिका भित्रका ६ वटा बिद्यालयका बिद्यार्थीहरूकाे सहभागीता रहेको शिक्षा शाखा प्रमुख विष्णु केसीले जानकारी दिनुभयो ।
