ब्लड क्यान्सरबाट पीडित ऋषिङका खेमबहादुर थापालाई सहयोगको अपिल

तनहुँ जिल्लाको ऋषिङ गाउँपालिका–१ कोईदिम निवासी ३८ वर्षीय खेमबहादुर थापा यतिबेला ब्लड क्यान्सर रोगसँग संघर्षरत छन् । करिब दुई महिनाअघि स्वास्थ्यमा समस्या देखिएपछि उनलाई उपचारका लागि पोखरा हुँदै काठमाडौं लगिएको थियो । विभिन्न अस्पतालमा उपचार तथा परीक्षणपछि चिकित्सकहरूले थप उपचारका लागि भारत लैजानुपर्ने सुझाव दिएका छन् ।
खेमबहादुरका दाजु भिमबहादुर थापाका अनुसार उपचारका लागि करिब ५० लाख रुपैयाँ खर्च लाग्ने बताइएको छ । आर्थिक अवस्था कमजोर भएकाले परिवारले यति ठूलो रकम जुटाउन नसक्ने अवस्था रहेको उनले बताए ।
दैनिक मजदुरी गरेर परिवार पाल्दै आएका खेमबहादुरको उपचार खर्च जुटाउन अहिले परिवार निकै समस्यामा परेको छ । परिवारले सबैसँग मानवीय सहयोगको अपिल गरेको छ ।
“हामी गरिब परिवार हौं । उपचारका लागि घरको सबै स्रोत सकिएको छ । अब सहयोगी मन भएका सबैसँग सहयोगको अपेक्षा गरेका छौं,” दाजु भिमबहादुर थापाले भने ।

स्थानीयवासी तथा आफन्तहरूले पनि खेमबहादुरको जीवन बचाउन आर्थिक सहयोग गर्न आग्रह गरेका छन् । समयमै उपचार हुन सके खेमबहादुरलाई बचाउन सकिने विश्वास परिवारको रहेको छ ।