छोरी खुस्बुको स्मृतीमा आमा मन कुमारी द्वारा दमौली अस्पताललाई पंखा हस्तान्तरण

तनहुँकाे बन्दिपुर निवासी मन कुमारी रानाले स्वर्गीय छोरी खुस्बु राना मगरको पुण्य स्मृतीमा दमौली अस्पताललाइ ४ थान पंखा सहयोग हस्तान्तरण गरेकी छन् ।

दुवै मृगौला फेल भएर छाउनी अस्पताल काठमाण्डाैंमा डायलाईसिस गर्दैगर्दा छोरी खुस्बु राना मगरको ठिक १ वर्ष अघि (२०८० श्रावण १५ गते) कै दिनमा मृत्यु भएको थियो । छाेरीकाे अंग ट्रान्सप्लाण्ट को तयारी गर्दा गर्दै २० वर्षको अल्पायूमा मृत्यु भएकोमा परिवारमा ठुलो चाेट परेको थियो ।

त्यही पिडा र अवस्था सम्झेर दमौली अस्पतालमा डायलाईसिस सेवा लिन आएका विरामीहरुको लागि केही सितलता हाेस भनी छोरी खुस्वुको स्मृती दिवस पारी पंखा सहयोग गरेको आमा मन कुमारी रानाले बताइन् । स्वर्गीय छोरी खुस्बुको सम्झनामा हरेक बर्ष श्रावण १५ गते दमौली अस्पताललाई आवश्यकताका आधारमा अन्य सामागृहरु उपलब्ध गराउदै जाने समेत रानाले बताइन् ।
उक्त अवसरमा दमौली अस्पतालको तर्फबाट डा. कमल भण्डारीले सामाग्रि बुझ्दै सहयोगी राना परिवारलाई धन्यवाद दिएका थिए ।