मन्त्री भए पछि पहिलोपटक तनहुँ आउँदै स्वास्थ्यमन्त्री पाैडेल

मन्त्री भए पछि स्वास्थ्य तथा जनसंख्या मन्त्री प्रदीप पौडेल पहिलोपटक गृह जिल्ला तनहुँ आउने भएका छन् । मन्त्री पाैडेल यही साउन २१ गते नेपाली काङ्ग्रेस तनहुँले गर्ने स्वागत तथा बधाई कार्यक्रममा भाग लिन तनहुँ आउन लागेकाे काङ्ग्रेस तनहुँका सचिव लक्ष्मीभक्त खनालले बताए ।

तनहुँमा जन्मिएका नेता मन्त्री बन्न सफल भएकोमा काङ्ग्रेस पार्टी कार्यलय दमाैलीमा बधाई तथा स्वागत कार्यक्रम राखिएको खनालले जानकारी दिए । मन्त्री पौडेललाई स्वागत गर्न तथा बधाई दिन जिल्लाका सबै कांग्रेसका नेता,कार्यकर्ता , जनप्रतिनिधी एवम् भातृ संगठन लाई निमन्त्रणा गरिएको उनलेे बताए ।
यस्तै मन्त्री पौडेलले शुक्लागण्डकी नगरपालिका-२ गाछेपानीमा यही साउन २१ गते देखि हुने शिव महिमा बोलबम धार्मिक महोत्सव कार्यक्रमकाे समेत उद्घाटन गर्ने कार्यक्रम रहेको छ ।

श्री शुक्लागण्डकी मुक्तिनाथ च्यवनधामको आयोजनामा साउन २१ देखि २८ गते सम्म हुने धार्मिक महोत्सवको मन्त्री पाैडेलले उद्घाटन गर्ने स्थानीय युवा त्रिलाेचन लम्सालले बताए ।