शुक्लागण्डकीलाई पराजित गर्दै म्याग्दे तीन लाख पुरस्कारको फुटबलको फाइनलमा

तनहुँको म्याग्दे गाउँपालिकाकाे आयाेजनामा भइरहेको गण्डकी प्रदेशको पालिका स्तरीय नकआउट फुटबल प्रतियोगिताकाे फाइनलमा म्याग्दे गाउँपालिका पुग्न सफल भएको छ । मंगलबार भएकाे पहिलो सेमीफाइनल खेलमा म्याग्दे गाउँपालिकाले शुक्लागण्डकी नगरपालिका लाई पेनाल्टीमा पराजित गरेसँगै म्याग्दे फाइनलमा पुगेको हाे । अब बन्दिपुर गाउँपालिका र दोर्दी गाउँपालिका बिचकाे अर्को सेमिफाइनल खेलमा बिजेता हुने टिमसँग म्याग्देकाे फाइनलमा भेट हुने भएको म्याग्दे गापा शिक्षा शाखा प्रमुख बिष्णु केसीले बताए ।

प्रतियोगितामा प्रथम पुरस्कार रु तीन लाख रहेको छ भने द्वितीय पुरस्कार रु एक लाख ५० हजार तथा विजेता र उपविजेता टिम र खेलाडीलाई ट्रफी, मेडल र प्रमाण–पत्र प्रदान गरिने गाउँपालिकाले जनाएको छ । साथै सेमिफाइनल पुग्ने दुई टिमलाई रु १५÷१५ हजार, ट्रफी, मेडल र प्रमाण–पत्र प्रदान गरिनेछ । त्यस्तै प्रतियोगिताका उत्कृष्ट खेलाडीलाई नगद दश हजार र विधागत तर्फ सर्वाधिक गोलकर्ता, उत्कृष्ट मिडफिल्डर, उत्कृष्ट डिफेन्डर, उत्कृष्ट गोलरक्षक र उत्कृष्ट प्रशिक्षकलाई जनही रु पाँच हजार र सेमिफाइनल पछिका हरेक खेलका म्यान अफ द म्याच खेलाडीलाई जनही रु पाँच हजार नगद पुरस्कार प्रदान गरिने प्रमुख प्रशासकीय अधिकृत नारायणप्रसाद अधिकारीले जानकारी दिए । 

नेपालको लोकप्रिय खेल फुटबलका लागि म्याग्दे गाउँपालिका फुटबल खेलाडी उत्पादनमा उर्वर भूमिका रुपमा परिचित गराउन तथा खेलकुदको माध्यमबाट म्याग्देको थप पहिचान गराउन उक्त प्रतियोगिता आयोजना गरिएको गाउँपालिकाले जनाएको छ ।

‘म्याग्देको पर्यटन विकासका लागि खेलकुद’ भन्ने मूल नाराका साथ फागुन १६ देखि वडा नम्बर ५ को छाङपाटन खेलमैदानमा प्रतियोगिता भएको हाे ।