म्याग्दे गाउँपालिका स्थापना दिवस तथा पुरस्कार वितरण कार्यक्रम सम्पन्न

तनहुँको म्याग्दे गाउँपालिकाकाे आयाेजनामा भएकाे गण्डकी प्रदेशको पालिका स्तरीय नकआउट फुटबल प्रतियोगिताकाे उपाधि आयाेजक म्याग्दे गाउँपालिकाले जितेको छ । लमजुङको दाेर्दी गाउँपालिकालाइ पेनाल्टीमा पराजित गर्दै म्याग्देले उपाधि जितेको हाे । प्रतियोगितामा प्रथम भए सँगै म्याग्देले तीन लाख पुरस्कार पाएकाे छ भने द्धितीय भएको दाेर्दी गाउँपालिकाले रु एक लाख ५० हजार तथा ट्रफी, मेडल र प्रमाण–पत्र प्राप्त गरेकाे छ । प्रतियोगितामा प्रथम तथा द्धितीय हुने टिमलाई म्याग्दे गाउँपालिका स्थापना दिवसको अवसरमा कार्यक्रमका प्रमुख अतिथि गण्डकी प्रदेशका पुर्व मुख्यमन्त्री खगराज अधिकारीले पुरस्कार वितरण गरेका छन् ।

उक्त अवसरमा प्रमुख अतिथि अधिकारीले स्थानीय तहमा बिकासले फड्को मारेको बताए । पञ्चायतकालमा साइकल चल्ने बाटो नभएको ठाउँमा अहिले ठुलाठुला सडक निर्माण भएको मात्रै हाेइन पुर्वाधार निर्माणले समेत फड्को मारेको उनलेे बताए । गणतन्त्र , लाेकतन्त्र पश्चातकाे याे सुन्दर फुलबारीमा जनताको चाहना र आवस्यकता कैयौं पूरा हुँदै गएको र अझै धेरै गर्न बाँकी रहेको उनकाे भनाइ थियो । म्याग्दे गाउँपालिकाका अध्यक्ष श्रीप्रसाद श्रेष्ठको अध्यक्षतामा भएको स्थापना दिवस तथा पुरस्कार वितरण कार्यक्रममा भलिबल , बास्केटबल लगायतका खेलमा बिजयी टिमलाई समेत पुरस्कार वितरण गरिएको थियो । यस्तै उक्त अवसरमा तनहुँ म्याग्दे घर भइ राष्ट्रिय महिला फुटबल टिमका खेलाडी विमला विक , मनाङ मर्स्याङ्दी क्लवबाट खेल्ने निरञ्जन मल्ल र ब्रिगेड व्वाइजबाट खेल्ने विशाल नेपालीलाई सम्मान गरिएको थियो ।

लोकप्रिय खेल फुटबलका लागि म्याग्दे गाउँपालिका फुटबल खेलाडी उत्पादनमा उर्वर भूमिका रुपमा परिचित गराउन तथा खेलकुदको माध्यमबाट म्याग्देको थप पहिचान गराउन उक्त प्रतियोगिता आयोजना गरिएको गाउँपालिकाले जनाएको छ ।

‘म्याग्देको पर्यटन विकासका लागि खेलकुद’ भन्ने मूल नाराका साथ फागुन १६ देखि वडा नम्बर ५ को छाङपाटन खेलमैदानमा प्रतियोगिता भएको थियो ।
कार्यक्रममा जिल्ला समन्वय प्रमुख शान्तिरमण वाग्ले , गाउँपालिकाका उपाध्यक्ष बालकृष्ण घिमिरे , निवर्तमान अध्यक्ष मायादेवी राना , प्रमुख प्रशासकिय अधिकृत नारायणप्रसाद अधिकारी लगायतका जनप्रतिनिधि , राजनीतिक दलका प्रमुख एवम् प्रतिनिधिले स्थापना दिवसको शुभकामना व्यक्त गरेका थिए ।