दुलेगौंडामा सम्पन्न गण्डकी प्रदेश स्तरीय गजल प्रतियोगितामा कास्कीका निकेश प्रथम

तनहुँको शुक्लागण्डकी –४ दुलेगौंडामा शनिवार सम्पन्न गण्डकी प्रदेश स्तरीय गजल प्रतियोगितामा कास्कीका निकेश गिरी प्रथम भएका छन् । शुक्ला साहित्य संगमले आयोजना गरेको प्रतियोगितामा गोरखाका कृष्ण बहादुर महत द्धितीय र कास्कीका मदन घिमिरे तृतीय भए । प्रथम,द्धितीय र तृतीय हुनेहरुले क्रमशः ११ हजार, ७ हजार र ५ हजार नगदका साथै प्रमाणपत्र प्राप्त गरे । उनीहरुलाई शुक्लागण्डकी नगरपालिकाका नगर उपप्रमुख खुम बहादुर विक राजु, संगमका संरक्षक शेषमणि आचार्य, संंगम अध्यक्ष टुकादेवी पौडेल आचार्य लगायतले पुरस्कार प्रदान गरेका थिए ।

प्रतियोगितामा गजलकार रुपिन्द्र प्रभावी ‘कटु’, सरस्वती श्रेष्ठ ‘सरु’ र अनुराग अधिकारी निर्णायक रहेका थिए । शुक्ला साहित्य संगमको आयोजनामा शुक्लागण्डकी नगरपालिकाको युवासँग नगरपालिका कार्यक्रम अन्तर्गत प्रतियोगिता आयोजना गरिएको हो । गण्डकी प्रदेशभरका ३० जना गजलकारले अनलाइनमार्फत सिर्जना पठाएका थिए । उत्कृष्ट १० मा छनोट भएकालाई शनिबार प्रतिस्पर्धा गराइएको हो । संगम अध्यक्ष टुकादेवी पौडेल आचार्यको अध्यक्षतामा भएको कार्यक्रमको सञ्चालन सचिव जुना खड्काले गरेकी थिइन् ।