भिम्बाद बहुउद्देश्यीय एग्रो कपको उपाधी शुक्लागण्डकी बाबियोडाँडालाई

भिम्बाद बहुउद्देश्यीय एग्रो समूह, भिमाद नपा–६ तनहुँ द्वारा आयोजित दोस्रो भिम्बाद बहुउद्देश्यीय कप–२०८२ को उपाधि शुक्लागण्डकी नगरपालिका–बाबियोडाँडा ठकुरी समाजले उचाल्न सफल भएको छ । साेमबार भएको फाइनल खेलमा शुनपा–१० लोकादीटारलाई ३–१ सेटमा पराजित गर्दै बाबियोडाँडाले उपाधि चुमेको हो ।

बाबियोडाँडाले सेमीफाइनल खेलमा बौदीकाली–३ लाई पराजित गर्दै फाइनलमा प्रवेश गरेको थियो भने लोकादीटारले भिमाद नपा–२ बोक्सानलाई पराजित गर्दै फाइनलमा स्थान बनाएको थियो ।

प्रतियोगितामा प्रथम स्थान हासिल गर्ने टिमले नगद ५० हजारसहित शिल्ड, मेडल र प्रमाणपत्र प्राप्त गरेको थियो भने द्वितीय स्थान हासिल गरेकाे टिमले ३० हजारसहित शिल्ड, मेडल र प्रमाणपत्र प्राप्त गरेका छन् । यस्तै सान्त्वना स्थान हासिल गर्ने बौदीकाली र बोक्सानले जनही १०/१० हजार रुपैयाँ प्राप्त गरेका छन् ।

कार्यक्रमलाई सम्बोधन गर्दै प्रमुख अतिथि समाजसेवी झक बहादुर सारु, विशिष्ट अतिथि नेपाल निवृत्त शिक्षक समाज भिमादका अध्यक्ष चन्द्र प्रकाश सुवेदी, समाजसेवी दिना गोतामे र पोखरा इन्भेष्टमेन्ट प्रा.लिका प्रो. क्षितिज बराल लगायतका वक्ताहरुले खेलकुदले समाजमा एकता, अनुशासन र सद्भाव वृद्धि गर्ने भएकाले यस्ता कार्यक्रमलाई निरन्तरता दिनुपर्नेमा जोड दिएका थिए । उनीहरुले युवा पुस्तालाई खेलकुदमार्फत सही दिशातर्फ अघि बढाउन सकिने भएकाले आगामी दिनमा अझ व्यवस्थित रुपमा यस्ता प्रतियोगिता गर्न आवश्यक रहेकोमा एकमत जनाउँदै विजेता तथा उपविजेता टिमलाई बधाई दिएका थिए ।

संविधान दिवसको अवसरमा आयोजित भलिबल प्रतियोगितामा असोज ३ गते राष्ट्रिय भलिबल खेलाडी विश्वास अधिकारी, विवश आले र हिमाल सुनारी तथा समापनमा उदयमान खेलाडी चन्द्र गाहा मगरलाई नगदसहित सम्मान गरिएको क्लबका सहसचिव सुरज विकले जानकारी दिए ।

भिम्बाद बहुउद्देश्यीय एग्रो समूहले वर्षेनी भलिबल प्रतियोगिताको आयोजना गर्दै आइरहेको र आगामी दिनमा पनि यसलाई निरन्तरता दिने समूहका अध्यक्ष दिजन रानाले बताएका छन् । फाेटाे भिमाद एफएम