आबुखैरेनीमा मन्जिल रानाको समर्थनमा युवाहरूको सक्रियता बढ्दो

उज्यालो नेपाल पार्टीका तर्फबाट तनहुँ क्षेत्र नं. १ मा उम्मेदवार रहेका युवा अभियन्ता मन्जिल रानाको पक्षमा आबुखैरेनी क्षेत्रमा युवाहरूको सक्रियता दिनप्रतिदिन बढ्दै गएको छ। पछिल्ला दिनहरूमा स्थानीय युवाहरू घरदैलो अभियान, मतदाता भेटघाट तथा अन्तरक्रिया कार्यक्रममार्फत मत माग्ने अभियानमा सक्रिय रूपमा जुटिरहेका छन्।
युवाहरूले मन्जिल रानालाई इमानदार, ऊर्जाशील र परिवर्तनका संवाहक उम्मेदवारका रूपमा प्रस्तुत गर्दै विकास, रोजगारी, सुशासन तथा युवामैत्री नीति प्राथमिकताका विषयमा मतदातासँग छलफल गरिरहेका छन्। विशेषगरी शिक्षित तथा सचेत युवाहरूको उल्लेखनीय सहभागिताले अभियानलाई थप ऊर्जा दिएको छ।

स्थानीय बासिन्दाहरूका अनुसार आबुखैरेनी क्षेत्रमा उज्यालो नेपाल पार्टीप्रति जनचासो बढ्दो क्रममा छ। युवाहरूको संगठित प्रयास र उत्साहले मन्जिल रानाको चुनावी अभियानलाई थप प्रभावकारी बनाउने विश्वास व्यक्त गरिएको छ।