आँबुखैरेनीमा ८० बर्ष माथिका दलित जेष्ठ नागरिकलाई सम्मान

१९औं जातीय भेदभाव तथा छुवाछुत उन्मूलन राष्ट्रिय दिवसको अवसरमा आँबुखैरेनीका ८० बर्ष माथिका १८ जना दलित जेष्ठ नागरिकलाई सम्मान गरिएको छ । “जातीय भेदभाव तथा छुवाछुत अन्त्य गरौं, समतामूलक समाजको निर्माण गरौं”भन्ने नारासहित आँबुखैरेनीमा आयोजित कार्यक्रममा उनिहरूलाइ नगद सहित दोसल्ला र सम्मानपत्रले सम्मानित गरिएको हो। 

आँबुखैरेनी गाउँपालिका अध्यक्ष शुक्र चुमानले जेष्ठ नागरिकहरुलाई सम्मान गर्दै दलित समुदायलाई सधैं प्राथमिकता राखेर गाउँपालिकाले नीति तथा कार्यक्रम अघि बढाउँदै आएको बताए । कार्यक्रमका विशिष्ट अतिथि उपाध्यक्ष दुर्गा अर्यालले जातिय छुवाछुत र भेदभाव सामाजिक अपराध भएकाले यस्ता कार्यलाई निरुत्साहित गरिनुपर्नेमा जोड दिएकी थिइन् । 
इलाका प्रहरी कार्यालय आँबुखैरेनीका प्रहरी प्रमुख प्रहरी निरीक्षक टेकप्रसाद सुबेदीले छुवाछुत तथा जातीय भेदभाव सम्बन्धी कानुनी संरचना र दण्डनीय हुने व्यवस्थाबारे बताएका थिए । 
सोही अवसरमा गाउँपालिकामा निर्वाचित आठ जना दलित जनप्रतिनिधिहरूलाई पनि सम्मान गरिएको थियो ।
गाउँपालिका कार्यपालिका सदस्य गंगा विकको सभापतित्वमा सम्पन्न उक्त कार्यक्रममा वडा अध्यक्षहरू, कार्यपालिका सदस्यहरू, समाजसेवी तथा बुद्धिजीवीहरूको सक्रिय सहभागीता रहेको थियो । कार्यक्रममा बोल्ने वक्ताहरुले समाजमा समता, सम्मान र समान अवसर सुनिश्चित गर्नुपर्नेमा जोड दिदै दलित समुदायले भोग्दै आएका सामाजिक दमन, विभेद र त्यसले पार्ने मानसिक तथा आर्थिक असरबारे आ आफ्ना धारणा राखेका थिए।