सशस्त्र प्रहरी बल मनकामना गणका इन्स्पेक्टर जिसीकाे नेतृत्वमा अर्चल धारा निर्माण

डुम्रे–बेसीशहर सडक खण्डअन्तर्गत तनहुँ जिल्लाको भानु नगरपालिका–९ मा पर्ने अर्चल धारामा ऐतिहासिक महत्व बोकेको धारो निर्माण कार्य तीव्र रूपमा अघि बढिरहेको छ। स्थानीय संस्कृति, सभ्यता र पुरातात्त्विक पहिचानसँग जोडिएको यस धारो पुनर्निर्माण तथा संरक्षण कार्यले यस क्षेत्रको ऐतिहासिक महत्वलाई थप उजागर गर्ने अपेक्षा गरिएको छ।
उक्त निर्माण कार्य तनहुँ जिल्लाको भानुमा अवस्थित सशस्त्र प्रहरी बल मनकामना गणका प्रहरी निरीक्षक वसन्त जिसीको नेतृत्वमा सम्पन्न भइरहेको छ। स्थानीय समुदाय, जनप्रतिनिधि तथा सुरक्षाकर्मीको सहकार्यमा अघि बढाइएको यो अभियान सामाजिक उत्तरदायित्व र सांस्कृतिक संरक्षणको उदाहरणका रूपमा लिइएको छ।
स्थानीय बासिन्दाका अनुसार अर्चल धारा विगतमा यात्रु र गाउँलेहरूको प्रमुख पानीको स्रोत मात्र नभई सामाजिक जमघट र सांस्कृतिक गतिविधिको केन्द्र पनि थियो। समयसँगै जीर्ण बन्दै गएको धारालाई संरक्षण गरी नयाँ स्वरूपमा पुनःनिर्माण गर्दा पुरानो शैली, ढुंगाको बनावट र ऐतिहासिक पहिचानलाई यथासम्भव जोगाइने बताइएको छ।
प्रहरी निरीक्षक जिसीले ऐतिहासिक सम्पदाको संरक्षण सबैको साझा दायित्व भएको उल्लेख गर्दै, “यस धाराको पुनर्निर्माणले स्थानीय इतिहास जोगिनुका साथै भावी पुस्तालाई आफ्नो पहिचान बुझ्न मद्दत गर्नेछ,” भन्नुभयो। उहाँका अनुसार निर्माण कार्यमा स्थानीयको सक्रिय सहभागिता रहेकाले काम छिटो र प्रभावकारी रूपमा अघि बढिरहेको छ।
भानु नगरपालिका–९ का जनप्रतिनिधिहरूले पनि यस कार्यको प्रशंसा गर्दै, धारो निर्माण सम्पन्न भएपछि धार्मिक, सांस्कृतिक तथा पर्यटकीय दृष्टिले समेत यस स्थानको महत्व बढ्ने विश्वास व्यक्त गरेका छन्। निर्माण सम्पन्न भएपछि धारो आसपास सरसफाइ, विश्रामस्थल र जानकारीमूलक सूचनापाटी राख्ने योजना पनि रहेको जनाइएको छ।