फोहोरमैला व्यवस्थापनमा व्यास नगरपालिकाको ध्यानाकर्षण

तनहुँ — व्यास नगरपालिका ले फोहोरमैला व्यवस्थापनलाई प्रभावकारी बनाउन पुनः ध्यानाकर्षण गराएको छ। नगर प्रमुख बैकुण्ठ न्यौपाने द्वारा जारी विज्ञप्तिमा दैनिक रूपमा संकलन भइरहेको फोहोरलाई दीर्घकालीन रूपमा व्यवस्थापन गर्न चुनौती रहेको उल्लेख गरिएको छ।
नगरपालिकाले हाल फोहोर संकलन कार्यलाई निरन्तरता दिँदै आएको भए पनि अन्तिम व्यवस्थापनका लागि उपयुक्त स्थान अभाव देखिएको जनाएको छ। फोहोर व्यवस्थापनका लागि नयाँ जग्गा प्राप्त गर्ने प्रक्रिया अगाडि बढाइएको भए पनि आवश्यक स्वीकृति ढिलाइ हुँदा समस्या ज्यूँका त्यूँ रहेको जनाइएको छ।

विज्ञप्तिमा नगरवासीलाई केही दिन धैर्य गर्न अनुरोध गर्दै घर तथा टोलस्तरमै फोहोर व्यवस्थापनमा सहयोग गर्न आग्रह गरिएको छ। साथै, सरोकारवाला निकायसँग समन्वय गरी छिट्टै दीर्घकालीन समाधान खोज्ने प्रतिबद्धता पनि विज्ञप्तिमा जनाइएको छ।