तनहुँ कालिका शहीद शान्ति पार्क क्षेत्रमा म्याग्दे दमाैली समाजको वृक्षारोपण
म्याग्दे दमौली समाजकाे आयाेजना तथा तनहुँ कालिका शहीद शान्ति पार्क संरक्षण समिति र वागभञ्याङ सामुदायिक वन उपभोक्ता समूहको सहकार्यमा तनहुँ कालिका शहीद शान्ति पार्क क्षेत्रमा वृक्षारोपण गरिएको छ।
धार्मिक, पर्यटकीय र वातावरणीय सौन्दर्यलाई समेट्ने उद्देश्य सहित तनहुँ कालिका शहीद शान्ति पार्क क्षेत्रमा वृक्षारोपण गरिएको हाे । व्यास नगरपालिका–४ स्थित कालिका मन्दिर जाने सिँढीमार्गको दायाँबायाँ भागमा विभिन्न जातका विरुवा रोपिँदा त्यस क्षेत्रको हरियालीपनसँगै पर्यटकीय आकर्षण थपिने विश्वासका साथ वृक्षारोपण गरिएको हाे ।
वृक्षारोपण कार्यक्रममा निम, तेजपत्ता, अमला, धुपी, चिउरी, वेल, कपुर र कल्की फूलसहितका ७२ वटा बिरुवा रोपिएको म्याग्दे दमौली समाज तनहुँका अध्यक्ष भाग्यशाली ढुँगानाले जानकारी दिए।
कार्यक्रममा वडाध्यक्ष मनबहादुर गुरुङ, दमाैली खानेपानीका अध्यक्ष बुद्धिमान श्रेष्ठ , सामुदायिक बनका उपाध्यक्ष विश्व सुवेदी , सचिव चिज गुरूङ लगायत स्थानीय टोलबासी, महिला समूह र युवाहरूको सक्रिय सहभागिता रहेको थियो।
वातावरण संरक्षण, जैविक विविधता प्रवर्द्धन तथा धार्मिक पर्यटनको सम्भावनालाई मजबुत बनाउने उद्देश्यले सञ्चालन गरिएको अभियानबाट कालिका जाने मार्ग थप आकर्षक र व्यवस्थित बन्ने अपेक्षा गरिएको छ । म्याग्दे बाट दमाैली आइ विभिन्न पेसा व्यवसायमा संलग्न रहेका व्यक्तिहरूलाइ समेटेर यसको स्थापना भएको हाे । स्थापना सँगै समाजले विभिन्न सामाजिक कार्यहरू गर्दै आएकाे छ ।
