तनहुँ युनेस्को क्लबद्वारा नयाँ सदस्य स्वागत तथा अन्तरक्रिया कार्यक्रम सम्पन्न

तनहुँ युनेस्को क्लबद्वारा नयाँ सदस्यहरूलाई स्वागत गर्ने उद्देश्यले आयाेजित स्वागत तथा अन्तरक्रिया कार्यक्रम सम्पन्न भएको छ । कार्यक्रममा क्लबमा हालै आवद्ध भएका नयाँ सदस्यहरूलाई औपचारिक रूपमा स्वागत गर्दै क्लबको उद्देश्य, गतिविधि तथा भावी योजनाबारे जानकारी गराइएको थियो ।

कार्यक्रममा बोल्दै क्लबका अध्यक्ष सराेज भण्डारीले युनेस्को क्लबको शैक्षिक, सांस्कृतिक तथा सामाजिक क्षेत्रमा रहेको भूमिकाबारे प्रकाश पारे । अध्यक्ष भण्डारीले नयाँ सदस्यहरूको सक्रिय सहभागिताले क्लबको अभियान थप सशक्त हुने विश्वास व्यक्त गर्दै आगामी दिनमा एकताबद्ध भएर हातेमालो गर्दै अगाडि बढ्ने बताए ।

अन्तरक्रिया सत्रमा नयाँ सदस्यहरूले क्लबप्रतिको अपेक्षा, सुझाव तथा भावी कार्यक्रमहरूबारे आफ्ना धारणा व्यक्त गरेका थिए । कार्यक्रमले सदस्यहरूबीच आपसी चिनजान, सहकार्य र एकताको भावना अभिवृद्धि गर्न महत्वपूर्ण भूमिका खेलेको क्लवका सचिव बसन्त जिसीले बताए ।

कार्यक्रमको समापनसँगै क्लबले आगामी दिनमा विभिन्न सामाजिक, शैक्षिक तथा सांस्कृतिक कार्यक्रमहरू सञ्चालन गर्ने प्रतिबद्धता जनाएको छ ।