मुखैमा आएको अर्थमन्त्री तनहुँबाट फुत्किने खतरा ! स्वर्णिममाथि खनालको छायाँ ?

संघीय राजनीतिमा अहिले राष्ट्रियसभा सदस्यको एक मनोनयन सिटले असाधारण चासो र बहस जन्माएको छ। सरकारको सिफारिसमा राष्ट्रपतिबाट हुने यो मनोनयनले आगामी मन्त्रिपरिषद् समीकरणसमेत प्रभावित गर्न सक्ने संकेत देखिएको छ। विशेषगरी तनहुँको राजनीतिक वृत्तमा भने यो विषयले झनै हलचल मच्चाएको छ।
सत्ता स्रोतहरूका अनुसार हालका अर्थमन्त्री रामेश्वर खनाललाई राष्ट्रियसभा सदस्य बनाएर पुनः मन्त्रिपरिषद्मा लैजाने तयारी तीव्र भएको चर्चा छ। यदि यस्तो भयो भने तनहुँबाट निर्वाचित सांसद डाक्टर स्वर्णिम वाग्लेकाे अर्थमन्त्री बन्ने सम्भावनामा ब्रेक लाग्न सक्छ ।
तनहुँबाट प्रतिनिधित्व गर्ने अर्थशास्त्री तथा सांसद स्वर्णिम वाग्ले लामो समयदेखि आर्थिक नीति बहसमा सक्रिय छन्। राजनीतिक वृत्तमा उनलाई भविष्यका सम्भावित अर्थमन्त्रीका रूपमा पनि हेरिँदै आएको थियो। अझ केही समयअघि रवि लामिछानेले सार्वजनिक रूपमा “नीति लेख्न सुरु गर्नुस्” भन्दै दिएको संकेतले पनि वाग्लेप्रति अपेक्षा बढाएको थियो।
तर अहिलेको मनोनयन खेलले तनहुँको त्यो सम्भावनामा नयाँ मोड ल्याउन सक्ने खतरा देखिएको छ। यदि खनाल राष्ट्रियसभामा प्रवेश गरेर फेरि अर्थमन्त्रालय सम्हाल्ने बाटो खुल्यो भने स्वर्णिम वाग्लेको उकालो यात्रा तत्कालका लागि चुनौतीपूर्ण बन्न सक्ने राजनीतिक विश्लेषकहरू बताउँछन्।
तनहुँमै पनि यो विषयलाई चासोका साथ हेरिएको छ। स्थानीय स्तरमा “मुखैमा आएको अर्थमन्त्री तनहुँबाट फुत्किने हो कि ?” भन्ने चर्चा सुरु भइसकेको छ। कतिपयले भने खनालको अनुभव र प्रशासनिक पकडलाई सकारात्मक रूपमा पनि लिएका छन्।
यसबीच राष्ट्रपतिको तर्फबाट मनोनयनमा आफ्ना व्यक्ति अघि सार्ने प्रयास र प्रधानमन्त्री पक्षबाट अर्थनीतिमा भरोसा राखिएको व्यक्तिलाई अघि बढाउने तयारीबीच रस्साकस्सी चलिरहेको बताइन्छ।

निष्कर्षतः राष्ट्रियसभाको एउटा सिट अहिले केवल संसदीय औपचारिकता मात्र होइन, आगामी आर्थिक नेतृत्व र तनहुँको राजनीतिक भविष्यसँग समेत जोडिएको विषय बनेको छ। मनोनयन कसको हुन्छ भन्ने निर्णयले केन्द्रको समीकरण मात्र होइन, तनहुँबाट उक्लिँदै गरेको राजनीतिक आकांक्षालाई पनि प्रत्यक्ष असर पार्न सक्छ। खासगरी रामेश्वर खनाललाई हालका प्रधानमन्त्री सुशीला कार्कीले रिक्त एक राष्ट्रिय सभामा लान चाहेको र बालेनले पनि खनाललाई नै मन्त्री बनाउन सक्ने एकथरीकाे विश्लेषण छ भने राष्ट्रपती रामचन्द्र पाैडेलले आफ्नै छाेरिलाइ सदस्य बनाउन चाहेको भनेर विभिन्न समाचारहरू बाहिरिएका छन् ।