तनहुँ बस दुर्घटना अपडेट: २ जनाको मृत्यु, २९ जना उपचाररत

तनहुँको शुक्लागण्डकी नगरपालिका क्षेत्रमा भएको बस दुर्घटनामा घाइतेमध्ये २ जनाको उपचारको क्रममा मृत्यु भएको छ भने २९ जना अझै विभिन्न अस्पतालमा उपचाररत रहेका छन्।
दुर्घटनामा जम्मा ३५ जना घाइते भएका थिए। तीमध्ये १७ जनाको पोखरास्थित मणिपाल शिक्षण अस्पतालमा, १२ जनाको अन्नपूर्ण अस्पतालमा उपचार भइरहेको छ भने ४ जना उपचारपछि डिस्चार्ज भएका छन्। उपचाररतमध्ये ६ जनाको अवस्था गम्भीर, १६ जनाको मध्यम र ७ जनाको अवस्था सामान्य रहेको जनाइएको छ।
उपचारका क्रममा मृत्यु हुनेमा तनहुँ म्याग्दे गाउँपालिका–१ निवासी ६५ वर्षीया जस माया सुनारको दिउँसो ४:३५ बजे मृत्यु भएको हो। उनको शव प्रदेश अस्पताल दमौलीको शवगृहमा राखिएको छ।
यस्तै, पाल्पा जिल्लाको मिस्ती गाउँपालिका–७ सिन्दुरे निवासी २४ वर्षीया धामिसरा रानाको पनि उपचारकै क्रममा दिउँसो ४:३० बजे मृत्यु घोषणा गरिएको छ। उनको शव जी.पी. कोइराला राष्ट्रिय श्वासप्रश्वास उपचार केन्द्र बेलचौतारामा राखिएको छ।