बारीमा उम्रेकाे च्याउ खाँदा तनहुँकाे म्याग्देका दुईको मृत्यु
बारीमा उम्रेकाे जंगली च्याउ खाँदा गम्भीर बिरामी भएका तनहुँकाे म्याग्दे गाउँपालिका–६ निवासी चार बर्षीय सुमित पुलामीको मृत्यु भएको छ । च्याउ खाएर गम्भीर बिरामी भएका उनको पाेखरा हुँदै शिक्षण अस्पताल काठमाण्डौंमा उपचारको लागि लगिएकाेमा उपचारकै क्रममा मृत्यु भएको हो ।
प्रदेश अस्पताल दमौलीमा प्राथामिक उपचारपछि बालकलाई शनिवार साँझ गण्डकी मेडिकल कलेज पोखरा रिफर गरिएको थियो । उक्त अस्पतालमा पनि उपचार संम्भव नदेखिएपछि थप उपचारका लागि काठमाण्डौं पठाइएकोमा उपचारको क्रममा मृत्यु भएको बताइएको छ । यसअघि सोमबार उपचारकै क्रममा म्याग्दे गाउँपालिका–६ सर्वलाङ बस्ने बर्ष ३० का नारायण मगरकाे मृत्यु भएको थियो । मगरको गण्डकी मेडिकल कलेज पोखरामा उपचारको क्रममा मृत्यु भएको थियो ।
आइतबार बारीमा उम्रिएको जंगली च्याउ खाँदा दश जना बिरामी भएका थिए । बिरामी भएकामध्ये आठ जना प्रदेश अस्पताल दमौलीमा उपचार पश्चात घर फर्किएका छन् ।
जिल्लाको म्याग्दे–६ सर्वलाङबाट बारीमा उम्रिएको च्याउ व्यास नगरपालिका–६ शान्तीटोल निवासी ६३ बर्षीय गुरु बहादुर पुलामीको घरमा ल्याई पकाएर खाँदा उनीहरु बिरामी भएका हुन् ।
उनीहरुमा बमेट,पखाला लाग्ने,रिङगाटा लाग्ने लक्षण देखिएको थियो ।
